Achega de 1.º de Bacharelato C ao Día de Rosalía e ao Día da Muller

O alumnado de 1.º de Bacharelato C tamén quixo sumarse ao chamamento feito pola Asociación de Escritores en Lingua Galega (AELG) para o Día de Rosalía que celebramos o pasado 24 de febreiro. Estas mozas e mozos crearon unha coreografía para un poema da nosa autora musicado, os versos escollidos foron os de "A xustiza pola man" e o grupo musical que o interpreta é Nao. A composición rosaliana é dunha dureza enorme que se acentúa no tema musical pola contundencia dos acordes da banda.

Esa elección, de atendermos agora ás datas nas que estamos, foi máis que acertada, denuncia a situación inxusta e cruel que padecía a muller no século XIX e que, desgrazadamente, aínda segue a sufrir. Ademais, amosa tamén a vixencia dunha muller poeta e feminista xa no seu tempo. Non pode ser máis completa, homenaxear a Rosalía coa mente posta no 8M deste 2021.

Fixeron un bo traballo e gozárono. A min prestoume moito, desfrutádeo vós tamén. 

Velaquí tedes o vídeo da coreografía.

E aquí o saúdo que mandou Jasper, voz e guitarra de Nao, para estas alumnas e alumnos despois de velo.